حوثیوں نے ٹیلی کمیونیکیشن پر سعودی حملوں کو سنگین غلطی قرار دیدیا

یمن کی حوثی حکومت کی وزارتِ خارجہ نے الحدیدہ میں واقع ٹیلی کمیونیکیشن کارپوریشن کی تنصیبات پر ہونے والے فضائی حملے کو سعودی عرب کی ایک سنگین اور بڑی غلطی قرار دیتے ہوئے متنبہ کیا ہے کہ اس جارحیت کا جواب ’جیسے کو تیسا‘ دیا جائے گا۔

حوثی وزارتِ خارجہ کی جانب سے جاری کردہ بیان میں کہا گیا ہے کہ یمن کا طویل محاصرہ ختم کرنے کے جائز اور بنیادی مطالبے کو تسلیم کرنے کے بجائے سعودی حکومت نے ایک بڑی غلطی کا ارتکاب کیا ہے، جس کی اسے بھاری قیمت چکانا پڑے گی۔ بیان میں مزید دعویٰ کیا گیا کہ سعودی بمباری میں بحیرہ احمر کے جزیرے ‘کمران’ کو بھی نشانہ بنایا گیا، جس کے نتیجے میں ایک خاتون شدید زخمی ہوئی۔

اسی دوران، حوثیوں سے وابستہ ٹی وی چینل ‘المسیرہ’ نے یمنی وزارتِ دفاع کے ذرائع کے حوالے سے دعویٰ کیا ہے کہ ان کے دفاعی نظام (ایئر ڈیفنس) نے کارروائی کرتے ہوئے متعدد سعودی جنگی طیاروں کو یمنی فضائی حدود سے فرار ہونے اور واپس لوٹنے پر مجبور کر دیا ہے۔