حوثی میزائلوں کے پرزے 16 ممالک سے یمن پہنچنے کا انکشاف

بین الاقوامی تحقیق اور ماہرینِ دفاع کی تازہ رپورٹ میں انکشاف ہوا ہے کہ یمن کے حوثی باغیوں کے میزائل پروگرام میں استعمال ہونے والے پرزے اور مواد 16 مختلف ممالک پر مشتمل عالمی سپلائی نیٹ ورک کے ذریعے یمن پہنچائے جاتے ہیں۔

تحقیقاتی رپورٹ کے مطابق میزائل ٹیکنالوجی کے معاملے میں حوثیوں کا ایران پر انحصار بتدریج کم ہو رہا ہے، کیونکہ گروپ نے مقامی سطح پر ہی میزائلوں کو اسمبل کرنے اور تیار کرنے کی صلاحیت میں نمایاں اضافہ کر لیا ہے۔ فراہم کردہ اعداد و شمار کے مطابق حوثیوں کے پاس پہنچنے والے میزائل پرزوں میں سے صرف 5 فیصد براہِ راست ایرانی ساختہ تھے، جو اس بات کی نشاندہی کرتے ہیں کہ ہتھیاروں کی تیاری کے لیے متعدد غیر ملکی ذرائع کا استعمال کیا جا رہا ہے۔

تاہم ماہرین کا کہنا ہے کہ حوثیوں کو میزائلوں کے اہم انجنوں اور ٹھوس راکٹ ایندھن (Solid Rocket Fuel) کی مقامی پیداوار میں اب بھی شدید مشکلات کا سامنا ہے، جس کی وجہ سے مکمل خود کفالت حاصل کرنے میں رکاوٹیں موجود ہیں۔ رپورٹ میں یہ بھی بتایا گیا ہے کہ حوثی اب بھی سمندری راستوں کے ذریعے غیر قانونی طور پر اسلحہ اور حساس پرزے یمن اسمگل کر رہے ہیں۔