آبنائے ہرمز کھلی رکھنے  کیلئےکئی ممالک جنگی بحری جہاز بھیج رہے ہیں، امریکی صدر

امریکی صدر ڈونلڈ ٹرمپ نے دعویٰ کیا ہے کہ آبنائے ہرمز کو کھلا رکھنے کے لیے کئی ممالک امریکا کے ساتھ مل کر اپنے جنگی بحری جہاز روانہ کر رہے ہیں۔

سماجی رابطے کی ویب سائٹ پر جاری بیان میں ڈونلڈ ٹرمپ نے آبنائے ہرمز پر سخت کارروائی کی دھمکی دیتے ہوئے کہا کہ اس اہم بحری گزرگاہ کی بندش سے متاثر ہونے والے متعدد ممالک اسے کھلا رکھنے کے لیے امریکا کے ساتھ تعاون کر رہے ہیں۔

ٹرمپ نے ایران کی فوجی صلاحیت کو تباہ کرنے کے اپنے دعوے کو دہراتے ہوئے کہا کہ ایران اب بھی اس قابل ہے کہ وہ ایک یا دو بغیر پائلٹ طیاروں سے حملہ کر دے یا آبنائے ہرمز اور اس کے اطراف میں میزائل حملہ کر سکتا ہے۔

ان کا کہنا تھا کہ ایران اس علاقے میں بارودی سرنگیں بھی بچھا سکتا ہے، تاہم امید ہے کہ چین، فرانس، جاپان، جنوبی کوریا، برطانیہ اور دیگر ممالک بھی اس اہم گزرگاہ کو محفوظ رکھنے کے لیے اپنے جنگی بحری جہاز بھیجیں گے۔

امریکی صدر نے کہا کہ امریکا آبنائے ہرمز کے ساحلی علاقوں پر شدید بمباری جاری رکھے گا اور ایرانی کشتیوں اور جہازوں کو نشانہ بناتا رہے گا۔

ٹرمپ کے مطابق امریکا جلد یا بدیر آبنائے ہرمز کو دوبارہ کھلا، محفوظ اور آزاد بنانے میں کامیاب ہو جائے گا۔