راولپنڈی: ہولی فیملی ہسپتال میں سنگین غفلت، دو دن کے زندہ بچے کا ڈیتھ سرٹیفکیٹ جاری

راولپنڈی میں نئے سال کے آغاز پر ہولی فیملی ہسپتال میں ڈاکٹروں کی مبینہ غفلت کا سنگین واقعہ سامنے آ گیا، جہاں دو دن کے زندہ بچے کا ڈیتھ سرٹیفکیٹ جاری کر دیا گیا۔

تفصیلات کے مطابق روبینہ نامی خاتون کے ہاں گزشتہ روز ہولی فیملی ہسپتال میں بچے کی پیدائش ہوئی، جس کی حالت تشویشناک بتائی گئی۔ ڈاکٹروں نے عجلت میں بچے کو مردہ قرار دے کر ڈیتھ سرٹیفکیٹ جاری کر دیا اور تحریری طور پر میت لواحقین کے حوالے کیے جانے کا بھی اندراج کیا گیا۔

تاہم لواحقین کی جانب سے ڈیتھ سرٹیفکیٹ جاری ہونے کے بعد بچے میں حرکت محسوس کی گئی، جس پر فوری طور پر بچے کے زندہ ہونے کی تصدیق ہوئی اور اسے وینٹی لیٹر پر منتقل کر دیا گیا۔

ڈیتھ سرٹیفکیٹ پر ڈاکٹر طیبہ صدف کی مہر اور دستخط موجود ہیں، جبکہ معاملے کے سامنے آنے کے بعد ہسپتال انتظامیہ نے واقعے کا نوٹس لے لیا ہے۔

ایم ایس ہولی فیملی ہسپتال ڈاکٹر اختر محمود ملک نے بتایا کہ پیڈز ڈیپارٹمنٹ کی ہیڈ ڈاکٹر حنا ستار کی سربراہی میں انکوائری کمیٹی تشکیل دے دی گئی ہے، اور جو بھی اس غفلت کا ذمہ دار پایا گیا اس کے خلاف سخت کارروائی کی جائے گی۔

ایم ایس کے مطابق ابتدائی میڈیکل تشخیص میں یہ بات سامنے آئی ہے کہ بچہ Lazarus Syndrome کا شکار تھا، جس میں سانس کی رفتار انتہائی مدھم ہو جاتی ہے اور مریض مردہ محسوس ہوتا ہے۔