پنجاب کابینہ کے تاریخی فیصلے: شفافیت، تعلیم، ٹیکنالوجی، صحت اور نوجوانوں کی ترقی کے لیے بڑے اقدامات

وزیراعلیٰ پنجاب مریم نواز شریف کی زیر صدارت پنجاب کابینہ کے 31ویں اجلاس میں متعدد اہم فیصلے کیے گئے، جو شفافیت، تعلیم، ٹیکنالوجی، صحت، انفراسٹرکچر، نوجوانوں کی ترقی، روزگار اور عوامی سہولت کے لیے سنگِ میل ثابت ہوں گے۔

اجلاس میں حکومت نے محکموں میں کرپشن کے خلاف سخت اقدامات کرنے اور ہر محکمے کی تین ماہ میں مکمل انکوائری مکمل کرنے کا اعلان کیا، تاکہ جوابدہی یقینی بنائی جا سکے۔وزیراعلیٰ کے مطابق پنجاب میں ڈیجیٹل انقلاب کے نئے باب کے تحت راولپنڈی میں صوبے کا دوسرا آئی ٹی سٹی قائم کیا جائے گا۔ نوجوانوں کی مہارت اور روزگار کے فروغ کے لیے ایک سال میں 2,300 نوجوانوں کو سکل پروفیشنلز بنانے کا ٹارگٹ مقرر کیا گیا۔لاہور میں جدید ٹریفک لائٹس سے ٹریفک کا نظام بدلنے اور زیبرا کراسنگ کے ذریعے سڑکیں محفوظ بنانے کی منظوری دی گئی۔ ہر شہر کی سڑکوں کے گڑھوں کی مرمت اور شہری سہولت کے لیے اقدامات کیے جائیں گے۔پنجاب میں امتحانات شفاف اور معیار کے مطابق ہوں گے، اور پہلی خودمختار امتحانی اتھارٹی قائم کی جائے گی۔ ہیڈ ٹیچرز کے الاؤنس میں پانچ ہزار سے بڑھا کر دس ہزار روپے کر دیا گیا۔لائیو سٹاک کو کمپنی بنا کر مویشی ایکسپورٹ کا ہدف دیا گیا، جبکہ ٹریفک قوانین کی پاسداری کرنے والے وارڈنز کے لیے انعامات مقرر کیے گئے۔ گندم کی بروقت کاشت اور دیگر صوبوں سے پہلے ہدف پورا کرنے پر وزیر زراعت اور ٹیم کو مبارکباد دی گئی۔کابینہ نے مذہبی رہنماؤں کی قدر اور کمیونٹی کی خدمت کو فروغ دینے کے لیے امام مسجد صاحبان کو اعزازیہ دینے کی پالیسی منظور کی۔ وزیراعلیٰ نے کہا کہ ایک پائی کی کرپشن بھی برداشت نہیں کی جا سکتی اور سرکاری خزانہ عوام کی امانت ہے۔مزید اقدامات میں مختلف محکموں میں خالی آسامیوں پر بھرتیوں کی منظوری، نئے میڈیکل انسٹیٹیوشنز میں کلینکل اور نان کلینکل اسٹاف کی بھرتی، ہسپتالوں کے لیے ضروری آلات کی خریداری اور نئے اداروں میں نان گزٹیڈ اسٹاف کی بھرتی شامل ہیں۔انفراسٹرکچر کے شعبے میں چیچہ وطنی، کمالیہ، پیر محل اور شور کوٹ روڈ کی 46 کلومیٹر سڑک کی تعمیر و توسیع کی منظوری دی گئی۔ گوجرانوالہ میں مریم نواز انسٹیٹیوٹ آف کارڈیالوجی کے قیام، ضلعی ترقیاتی سکیموں اور انسٹیٹیوٹ آف پبلک ہیلتھ میں واٹر ٹیسٹنگ لیبارٹری کے پراجیکٹس بھی منظور کیے گئے۔