مستقبل میں صحت کے نظام کے لیے 1.2 بلین ڈالر کی ضرورت، بروقت اقدامات نہ ہوئے تو قومی بحران،وزیر صحت

اسلام آباد: وفاقی وزیر صحت مصطفی کمال نے وفاقی پروگرام “حفاظتی ٹیکہ” میں سولر سسٹم کی انسٹالیشن کی تقریب سے خطاب کرتے ہوئے ملکی صحت کے نظام کی موجودہ صورتحال اور مستقبل کے چیلنجز پر روشنی ڈالی۔

مصطفی کمال کے مطابق آج صحت کے شعبے میں بین الاقوامی تعاون 49 فیصد ہے، جو 2031 تک ختم ہو جائے گا۔ مستقبل میں حکومت کو 1.2 بلین ڈالر خرچ کرنا پڑیں گے، جو حکومت اور معیشت پر بوجھ ڈالیں گے۔

وزیر صحت نے خبردار کیا کہ اگر بروقت اقدامات نہ کیے گئے تو پاکستان کو قومی صحت کے بحران کا سامنا کرنا پڑ سکتا ہے۔ انہوں نے کہا کہ چند سال قبل کورونا کے دوران امریکہ، چین، بھارت اور یورپ سمیت تمام ممالک کا صحت نظام ناکام ہوا، اور پاکستان میں صحت کا نظام مفلوج ہو چکا ہے۔

مصطفی کمال نے کہا کہ پاکستان میں ایک کروڑ تیس لاکھ لوگ غربت کی لکیر کے نیچے چلے گئے ہیں، اور یہ سب صحت یا بیماریوں کی وجہ سے متاثر ہوئے ہیں۔ انہوں نے وضاحت کی کہ ہیلتھ کیئر صرف ہسپتال بنانا نہیں بلکہ لوگوں کو بیماریوں سے بچانا ہے، اور صحت کی خدمات بچے کی پیدائش سے شروع ہوتی ہیں۔

وزیر صحت نے مزید کہا کہ پاکستان انڈونیشیا، چین اور سعودی عرب سے جدید ٹیکنالوجی لے رہا ہے، اور سعودی عرب کا 11 رکنی وفد حال ہی میں پاکستان کا دورہ کر چکا ہے تاکہ صحت کے شعبے میں تعاون کو فروغ دیا جا سکے۔