ہنگو میں دفعہ 144 نافذ، پانچ سے زائد افراد کے اجتماع پر پابندی عائد

خیبرپختونخوا کے ضلع ہنگو میں امن و امان کی نازک صورتحال کے پیشِ نظر ضلعی انتظامیہ نے فوری طور پر دفعہ 144 نافذ کرنے کا اعلان کر دیا ہے۔ ڈپٹی کمشنر ہنگو بصیر علی رحمان خان کی جانب سے جاری کردہ باضابطہ اعلامیے کے مطابق اس دفعہ کے تحت ضلع بھر میں پانچ یا اس سے زائد افراد کے غیر مجاز اجتماع، جلسے جلوسوں اور عوامی مقامات پر ہر قسم کے اجتماعات پر مکمل پابندی عائد کر دی گئی ہے۔

اعلامیے میں واضح کیا گیا ہے کہ سیکیورٹی کے موجودہ حالات اور امن و امان کو برقرار رکھنے کے لیے یہ ہنگامی اقدامات اٹھائے گئے ہیں تاکہ کسی بھی ناخوشگوار واقعے سے بخوبی نبردآطا ہوا جا سکے۔ ضلعی انتظامیہ کے مطابق ان پابندیوں کا اطلاق فوری طور پر شروع ہو چکا ہے جو آئندہ 30 روز تک پورے ضلع میں نافذ العمل رہیں گی۔ انتظامیہ نے شہریوں سے اپیل کی ہے کہ وہ امن و امان کی بحالی میں قانون نافذ کرنے والے اداروں کے ساتھ تعاون کریں اور قانون شکنی سے گریز کریں۔