حمزہ شہباز سے سابق و موجودہ اراکین اسمبلی اور سینیٹرز کی اہم ملاقاتیں

سابق وزیراعلیٰ پنجاب حمزہ شہباز شریف سے پرائم منسٹر ہاؤس میں سابق و موجودہ اراکینِ اسمبلی اور سینیٹرز نے اہم ملاقاتیں کیں، جن میں سائرہ افضل تارڑ، جمال شاہ کاکڑ، حفیظ الرحمان دریشک، مرتضیٰ جاوید عباسی، خرم دستگیر اور سابق سینیٹر بہرہ مند تنگی شامل تھے۔ ملاقاتوں کے دوران علاقائی مسائل پر تفصیلی گفتگو کی گئی اور انہیں ترجیحی بنیادوں پر حل کرنے کی یقین دہانی کرائی گئی۔ اس کے علاوہ حمزہ شہباز کی زیر صدارت پرائم منسٹر یوتھ پروگرام کے حوالے سے ایک اہم اجلاس ہوا جس میں چیئرمین یوتھ پروگرام رانا مشہود احمد خان نے بھی شرکت کی۔ اجلاس میں حمزہ شہباز نے بلوچستان، خیبر پختونخوا، جنوبی پنجاب اور چھوٹے شہروں کے نوجوانوں کو جدید تکنیکی کورسز کروانے اور تربیت کے دوران ماہانہ وظائف فراہم کرنے کی ہدایت کی، جبکہ کورسز کی مکمل سرپرستی اور تربیت کے بعد مارکیٹ میں روزگار کے مواقع پیدا کرنے کے عزم کا بھی اظہار کیا گیا۔