مشرق وسطیٰ کی کشیدگی، حج فلائیٹ شیڈول روک دیا گیا، ویزے جاری

وزارت مذہبی امور نے حج فلائیٹ کے شیڈول کی تیاری عارضی طور پر روک دی ہے تاکہ امریکہ اور اسرائیل کے ایران پر ممکنہ حملوں سے پیدا شدہ کشیدہ صورتحال کا جائزہ لیا جا سکے۔ ذرائع کے مطابق موجودہ حالات کے پیش نظر فلائیٹ شیڈول متاثر ہو سکتا ہے، تاہم شیڈول حالات کو مدنظر رکھ کر جاری کیا جائے گا۔

ذرائع نے بتایا کہ حج کے ویزوں کا اجراء جاری ہے اور دو تہائی عازمین کو ویزے جاری کر دیے گئے ہیں۔ ایک لاکھ 20 ہزار عازمین کے ویزوں کا اجراء ہفتے اور اتوار کو بھی جاری رہا، جس کے لیے وزارت کے ملازمین کی چھٹیاں منسوخ کر دی گئی ہیں۔

حج شیڈول میں فلائیٹ ٹائم ٹیبل، بلڈنگ بکنگ، روم ایلوکیشن اور دیگر انتظامات شامل ہوں گے اور یہ معلومات وزارت کی ویب سائٹ اور پاک حج موبائل ایپ پر دستیاب ہوں گی۔

ذرائع نے مزید کہا کہ عازمین کی تربیت کا دوسرا مرحلہ عید الفطر کے فوراً بعد شروع ہوگا اور تربیتی مواد اور شیڈول پہلے ہی تیار کر لیا گیا ہے۔