حج 2026: عازمین کو ’’گھر سے گھر‘‘ سہولیات فراہم کرنے کا فیصلہ

وزارتِ مذہبی امور نے حج 2026 کے انتظامات سے متعلق اہم فیصلوں کا اعلان کرتے ہوئے کہا ہے کہ عازمینِ حج کو عبادات سمیت تمام ضروری سہولیات کے لیے ’’گھر سے گھر‘‘ سروس فراہم کی جائے گی۔

وزارت کے مطابق عازمین کو ائرپورٹ سے روانگی کے وقت سے لے کر وطن واپسی تک معاون عملہ ہمراہ رہے گا جو ہر مرحلے پر رہنمائی فراہم کرے گا۔ مکہ مکرمہ اور مدینہ منورہ میں عازمین کو عبادات، رہائش، ٹرانسپورٹ اور بیماری کی صورت میں مکمل مدد فراہم کی جائے گی۔

حج 2026 کے لیے وزارتِ مذہبی امور 880 خدام الحجاج کی خدمات حاصل کرے گی۔ مرد و خواتین ناظمین اور معاون عملہ اس کے لیے اہل ہوں گے۔

خدام الحجاج کے لیے اہلیت کا معیار:

گریڈ 17 اور 18 کے افسران خدام الحجاج کے لیے اہل

عمر کی حد 45 سال مقرر

فیلڈ معاون عملے کے لیے عمر 25 سے 45 سال

فیلڈ معاون عملہ گریڈ 11 سے 16 تک اہل

نااہلی کی شرائط:

معذور اور کمزور جسامت کے افراد نااہل

ہائی بلڈ پریشر، شوگر اور دل کے مریض معاون عملے کے لیے اہل نہیں ہوں گے

وزارت کے مطابق تحریری امتحان میں کامیاب امیدواروں کے لیے پانچ کلومیٹر دوڑ مکمل کرنا لازمی ہوگا۔