حکومت کو پیچھے ہٹنا ہوگا، لٹر پٹرول پر 80 روپے لیوی ختم کرے: حافظ نعیم الرحمان

امیر جماعت اسلامی حافظ نعیم الرحمان نے پٹرولیم مصنوعات کی قیمتوں اور بھاری پٹرولیم لیوی کے خلاف دھرنے سے خطاب کرتے ہوئے حکومت سے پٹرول پر عائد 80 روپے فی لیٹر لیوی فوری ختم کرنے کا مطالبہ کر دیا ہے۔ انہوں نے واضح کیا کہ عوام کو 30 یا 32 روپے کی معمولی کمی سے مطمئن نہیں کیا جا سکتا بلکہ حکومت کو واقعی اور مکمل ریلیف فراہم کرنا ہوگا۔

حافظ نعیم الرحمان کا کہنا تھا کہ ایک لیٹر پٹرول پر تقریباً 130 روپے وصول کیے جا رہے ہیں جن میں 80 روپے لیوی شامل ہے۔ حکومت آئی ایم ایف (IMF) کے اہداف پورے کرنے کے لیے تمام تر بوجھ عوام پر ڈال رہی ہے جبکہ اشرافیہ اور آئی پی پیز (IPPs) کے ٹیکس معاف کیے جا رہے ہیں۔ انہوں نے اعلان کیا کہ 7 اگست کے ملک گیر احتجاج کے بعد اب تحریک کو گلی محلوں تک پھیلایا جائے گا اور 12 ربیع الاول کے فوراً بعد ملک گیر ہڑتال کی جائے گی۔ امیر جماعت اسلامی نے خبردار کیا کہ اگر مطالبات نہ مانیں گئے تو قوم اسلام آباد کا رخ کرے گی۔