امیر جماعت اسلامی حافظ نعیم الرحمن کی ایرانی سفارت خانے آمد؛ امریکی و اسرائیلی ‘دہشت گردی’ کی شدید مذمت،

جماعت اسلامی کے امیر حافظ نعیم الرحمن نے ایک اعلیٰ سطحی وفد کے ہمراہ ایرانی سفارت خانے کا دورہ کیا، جہاں انہوں نے ایرانی سفیر رضا امیری مقدم سے ملاقات کر کے حالیہ حملوں میں ہونے والی شہادتوں پر تعزیت اور شہدا کے درجات کی بلندی کے لیے دعا کی۔

حافظ نعیم الرحمن نے اس موقع پر گفتگو کرتے ہوئے کہا کہ پوری ملتِ اسلامیہ اور پاکستانی قوم کے دل اس وقت غم میں ڈوبے ہوئے ہیں۔ انہوں نے امریکہ اور اسرائیل کی کارروائیوں کو “کھلی دہشت گردی” قرار دیتے ہوئے اس کی بھرپور مذمت کی۔ ان کا کہنا تھا کہ کچھ قوتیں مسلکی تقسیم کے ذریعے امت کو بانٹنا چاہتی تھیں تاکہ امریکہ کو خوش کیا جا سکے، مگر وہ اپنے ناپاک مقاصد میں ناکام رہیں۔