ہماری تحریک نے سیاست کا رخ موڑ دیا ہے: حافظ نعیم الرحمان

امیرِ جماعت اسلامی حافظ نعیم الرحمٰن نے بونیر میں ایک بڑے جلسہ عام سے خطاب کرتے ہوئے کہا ہے کہ جماعت اسلامی کی عوامی تحریک نے ملک کی سیاست کا رخ موڑ دیا ہے۔ انہوں نے زور دیا کہ ان کی تحریک کسی خاص سیاسی جماعت، خاندانی اقتدار یا پارٹی لیڈر کے مفاد کے لیے نہیں بلکہ صرف اور صرف عوام کے حقوق اور ان کے بنیادی مسائل کے حل کے لیے چلا ئی جا رہی ہے، جس میں خیبرپختونخوا، بلوچستان، سندھ اور پنجاب کے نوجوان اور عوام بھرپور حصہ لے رہے ہیں۔

حافظ نعیم الرحمٰن نے حکمران اور دیگر روایتی سیاسی جماعتوں کو تنقید کا نشانہ بناتے ہوئے کہا کہ مہنگائی، بجلی کے بھاری بلز اور پٹرول کی قیمتیں ان پارٹیوں کی ترجیحات میں شامل نہیں ہیں۔ انہوں نے بونیر کی مقامی معیشت کا حوالہ دیتے ہوئے کہا کہ بھاری اور ظالمانہ ٹیکسوں کی وجہ سے علاقے میں ماربل کے 300 سے زائد کارخانے بند ہو چکے ہیں، جس کے باعث ہزاروں افراد روزگار سے محروم ہو گئے۔ امیرِ جماعت اسلامی نے عزم کا اعادہ کیا کہ ان کی پارٹی نوجوانوں کے حقوق اور عوامی مسائل کے حل کے لیے جدوجہد کا سلسلہ جاری رکھے گی۔