حافظ نعیم الرحمان کا حماس کے نو منتخب سربراہ خلیل الحیہ کو تہنیتی خط، مبارکباد پیش

امیر جماعت اسلامی پاکستان حافظ نعیم الرحمان نے حماس کے نو منتخب سربراہ خلیل الحیہ کو ایک تہنیتی خط ارسال کیا ہے، جس میں انہوں نے خلیل الحیہ کو تنظیم کی اعلیٰ قیادت سنبھالنے پر دلی مبارکباد پیش کی ہے۔ اپنے پیغام میں حافظ نعیم الرحمان کا کہنا تھا کہ وہ اپنی اور پوری جماعت اسلامی کی جانب سے انہیں حماس کا صدر منتخب ہونے پر مبارکباد دیتے ہیں، اور یہ بھاری ذمہ داری شہید یحییٰ السنوار جیسے عظیم قائد کے بعد ان کے سپرد ہوئی ہے۔ انہوں نے فلسطینی شہداء کی بے مثال قربانیوں اور ان کے پاکیزہ خون کو زبردست خراجِ عقیدت پیش کرتے ہوئے دعا کی کہ اللہ تعالیٰ خلیل الحیہ کی جدوجہد میں برکت عطا فرمائے اور فلسطینی عوام کو کامل آزادی اور فتح سے سرفراز کرے۔ امیر جماعت اسلامی نے مزید دعا کی کہ پروردگار فلسطین، امتِ مسلمہ اور دنیا بھر کے مظلوم انسانوں کو ظلم و جبر سے نجات عطا فرمائے۔