آؤٹ ہونے کے بعد بیٹ اور گلوز پھینکنے پر گل فیروزہ کو 1 ڈی میرٹ پوائنٹ

انٹرنیشنل کرکٹ کونسل (آئی سی سی) نے پاکستان ویمن کرکٹ ٹیم کی اوپنر گل فیروزہ کے خلاف ویمن ٹی ٹوئنٹی ورلڈ کپ کے دوران ضابطہ اخلاق کی خلاف ورزی پر کارروائی کرتے ہوئے انہیں باضابطہ طور پر سرزنش کی ہے اور ان کے کھاتے میں ایک ڈی میرٹ پوائنٹ کا اضافہ کر دیا ہے۔آئی سی سی کی جانب سے جاری کردہ اعلامیے کے مطابق، گل فیروزہ نے آسٹریلیا کے خلاف کھیلے گئے میچ کے دوران لیول ون ضابطہ اخلاق کی خلاف ورزی کی تھی۔ گورننگ باڈی کا کہنا ہے کہ گل فیروزہ آؤٹ ہونے کے بعد شدید مایوسی کا اظہار کرتے ہوئے جب واپس لوٹیں، تو انہوں نے ٹیم ڈگ آؤٹ کے قریب جارحانہ انداز میں اپنا بیٹ اور گلوز (دستانے) زمین پر دے مارے، جسے آئی سی سی نے کھیل کی ڈسپلنری پالیسی کے منافی قرار دیا۔

عالمی کرکٹ کونسل کے مطابق، پاکستانی بیٹر نے میچ کے بعد اپنی غلطی کا اعتراف کر لیا ہے اور میچ ریفری کی جانب سے تجویز کردہ سزا کو قبول کر لیا ہے، جس کے باعث اس معاملے پر کسی باضابطہ سماعت کی ضرورت پیش نہیں آئی۔واضح رہے کہ آئی سی سی کے ضابطہ اخلاق کے تحت لیول ون کی خلاف ورزی پر کھلاڑی کو کم از کم سرزنش، میچ فیس کا جرمانہ یا ڈی میرٹ پوائنٹس دیے جا سکتے ہیں۔ گل فیروزہ کے ریکارڈ میں اب ایک ڈی میرٹ پوائنٹ شامل ہو چکا ہے۔ یہ ڈی میرٹ پوائنٹس ایک مخصوص مدت تک کھلاڑی کے ریکارڈ کا حصہ رہتے ہیں اور اگر مقررہ وقت کے دوران ان کی تعداد بڑھ جائے تو کھلاڑی کو میچز کی معطلی یا سخت پابندیوں کا سامنا بھی کرنا پڑ سکتا ہے۔