ایران کے مسلسل حملے، خلیجی ممالک کو میزائل گرانے والے انٹرسیپٹرز کی کمی کا خدشہ

ایران کی جانب سے مسلسل میزائل اور ڈرون حملوں کے بعد خلیجی ممالک کے دفاعی ذخائر سے متعلق خدشات سامنے آنا شروع ہو گئے ہیں۔ امریکی اخبار کی رپورٹ کے مطابق ماہرین کا کہنا ہے کہ جس رفتار سے میزائل اور ڈرون مار گرانے والے انٹرسیپٹرز استعمال ہو رہے ہیں، اس کو مدنظر رکھتے ہوئے امکان ظاہر کیا جا رہا ہے کہ آئندہ ایک ہفتے کے اندر متعلقہ ممالک کو کمی کا سامنا کرنا پڑ سکتا ہے۔

رپورٹ میں کہا گیا ہے کہ حالیہ کشیدگی کے دوران دفاعی نظام پر غیر معمولی دباؤ دیکھا جا رہا ہے، جس کے باعث ذخائر تیزی سے کم ہونے کا خدشہ ظاہر کیا جا رہا ہے۔

تاہم متحدہ عرب امارات اور قطر نے ان خدشات کو مسترد کرتے ہوئے کہا ہے کہ خلیجی اور عرب ریاستوں کے پاس امریکی فوجی نظام کے ساتھ دنیا کے جدید ترین فضائی دفاعی نظام موجود ہیں اور وہ کسی بھی خطرے سے نمٹنے کی مکمل صلاحیت رکھتے ہیں۔

امریکی اخبار کے مطابق یوکرین میں جاری چار سالہ جنگ کے دوران معاونت کے بعد امریکی محکمہ دفاع کے پاس بھی دفاعی نظام پیٹریاٹ کے میزائلوں کا ذخیرہ بتدریج کم ہو رہا ہے، جس کے باعث خطے کی مجموعی دفاعی صورتحال پر سوالات اٹھائے جا رہے ہیں۔