برٹش پاکستانی خاتون بائیکر کا لندن تا لاہور تاریخی سفر شروع

برطانوی نژاد پاکستانی خاتون بائیکر گل افشاں طارق نے لندن سے لاہور تک موٹر سائیکل پر طویل اور تاریخی سفر کا آغاز کر کے ایک نئی مثال قائم کر دی ہے۔ 24 سالہ گل افشاں، جو مانچسٹر میں اپنے شوہر اور کمسن بیٹی کے ساتھ مقیم ہیں، اس مہم کے ذریعے لندن سے لاہور کا فاصلہ بائیک پر طے کرنے والی پہلی پاکستانی خاتون بننے کا عزم رکھتی ہیں۔ ان کے اس سفر کا بنیادی مقصد خواتین کے حقوق کے بارے میں شعور اجاگر کرنا اور یہ پیغام دینا ہے کہ پُرعزم خواتین ناممکن کو ممکن بنا سکتی ہیں۔

گل افشاں طارق کے سفر کے روٹ میں فرانس، سوئٹزرلینڈ، اٹلی، یونان اور ترکیہ شامل ہیں۔ تاہم، مشرقِ وسطیٰ کی موجودہ کشیدہ صورتحال کے باعث انہوں نے ایران کے بجائے جارجیا سے گزرنے والے متبادل راستے کا انتخاب کیا ہے، جہاں سے وہ پاکستان میں داخل ہوں گی۔ گل افشاں کا کہنا ہے کہ انہیں اس مہم کی تحریک اپنے والد کے عالمی اسفار اور پاکستان کی متحرک بائیکنگ کمیونٹی سے ملی ہے۔ وہ سمجھتی ہیں کہ پاکستان میں بائیک اب خواتین کے لیے نقل و حمل کا ایک مقبول اور بااختیار ذریعہ بنتی جا رہی ہے۔