یونیورسٹی آف گجرات کی بس کے ڈرائیور ہارٹ اٹیک سے انتقال، بس بے قابو ہو کر حادثے کا شکار

گوجرانوالا میں یونیورسٹی آف گجرات کی ایک چلتی بس کے ڈرائیور کو دل کا دورہ پڑنے کے باعث انتقال ہو گیا، جس کے بعد بس بے قابو ہو کر دوسری بس سے ٹکرا گئی۔ حادثے کے نتیجے میں 11 افراد زخمی ہوئے، جن میں طالبات اور یونیورسٹی اسٹاف شامل ہیں۔

ریسکیو ذرائع کے مطابق یہ واقعہ ساروکی کے قریب پیش آیا، جب ڈرائیور اچانک دل کا دورہ پڑنے کے باعث بس پر قابو کھو بیٹھا۔ دونوں بسیں یونیورسٹی آف گجرات کی تھیں اور گجرات سے علی پور چٹھہ کی جانب جا رہی تھیں۔

حادثے کے فوری بعد ریسکیو ٹیم موقع پر پہنچی اور زخمیوں کو طبی امداد کے لیے قریبی ہسپتال منتقل کیا گیا۔ بدقسمتی سے بس کا ڈرائیور موقع پر ہی دم توڑ گیا۔