گوجرخان میں نامعلوم افراد کی فائرنگ سے باپ بیٹا قتل

پنجاب کے شہر گوجر خان کی یونین کونسل جرموٹ کے گاؤں کینگھر خورد میں نامعلوم افراد نے فائرنگ کر کے باپ اور بیٹے کو موت کے گھاٹ اتار دیا، جس کے بعد علاقے میں شدید خوف و ہراس پھیل گیا ہے۔

گوجر خان پولیس کے مطابق ابتدائی اطلاعات سے معلوم ہوا ہے کہ ملزمان نے آتشیں اسلحے کا استعمال کرتے ہوئے ایک شہری اور اس کے بیٹے پر اندھا دھند فائرنگ کی۔ واقعے کی اطلاع ملتے ہی پولیس کی بھاری نفری جائے وقوعہ پر پہنچ گئی اور علاقے کو گھیرے میں لے کر شواہد اکٹھے کیے۔ دونوں مقتولین کی لاشوں کو پوسٹ مارٹم کے لیے ہسپتال منتقل کر دیا گیا ہے۔

دوسری جانب سی پی او راولپنڈی حسن مشتاق سکھیرا نے واقعے کا سخت نوٹس لیتے ہوئے ایس ایس پی انویسٹی گیشن، ایس پی صدر اور اے ایس پی گوجر خان کو فوری طور پر جائے وقوعہ پر پہنچنے کی ہدایت کی ہے۔ انہوں نے پولیس حکام کو حکم دیا ہے کہ واقعے کی ہر پہلو سے تحقیقات کی جائیں اور ملوث ملزمان کو جلد سے جلد گرفتار کر کے قانون کے کٹہرے میں کھڑا کیا جائے۔