بس بہت ہو چکا، مزید دباؤ برداشت نہیں کریں گے: ٹرمپ کی دھمکی پر گرین لینڈ کے وزیراعظم کا ردِ عمل

امریکی صدر ڈونلڈ ٹرمپ کی گرین لینڈ پر قبضے کی دھمکیوں کے بعد گرین لینڈ کے وزیراعظم جینس نیل سن نے سخت مؤقف اختیار کرتے ہوئے کہا ہے کہ ’’بس بہت ہو چکا، ہم مزید دباؤ برداشت نہیں کریں گے‘‘۔

وزیراعظم نے مزید کہا کہ امریکا سے الحاق کے خواب اب گرین لینڈ کے لیے قابل قبول نہیں ہیں۔ انہوں نے واضح کیا کہ مذاکرات کے لیے تیار ہیں، لیکن یہ مناسب چینل اور احترام کے ساتھ ہونے چاہئیں۔

ادھر فرانس نے بھی گرین لینڈ کے ساتھ یکجہتی کا اظہار کیا ہے۔ فرانسیسی وزارت خارجہ کے ترجمان نے کہا کہ سرحدیں طاقت کے ذریعے تبدیل نہیں کی جا سکتیں، اور گرین لینڈ، گرین لینڈ کے عوام اور ڈنمارک کے عوام کا ملک ہے، جس کے فیصلے انہی پر منحصر ہیں۔

یاد رہے کہ امریکی صدر ڈونلڈ ٹرمپ نے حال ہی میں گرین لینڈ پر قبضے کی دھمکی دی تھی، جس نے بین الاقوامی سطح پر کشیدگی پیدا کی ہے۔