گرین لینڈ پر تمام آپشنز کھلے، وینزویلا آئل پرمؤقف پر قائم ہیں ،وائٹ ہاؤس

وائٹ ہاؤس نے واضح کیا ہے کہ گرین لینڈ سے متعلق تمام آپشنز امریکا کے سامنے موجود ہیں، تاہم پہلا اور ترجیحی راستہ سفارت کاری ہی ہوگا۔
وائٹ ہاؤس کی ترجمان کیرولین لیوٹ نے پریس بریفنگ میں کہا کہ امریکا عالمی پابندیوں پر مکمل عملدرآمد یقینی بنائے گا اور بحرِ اوقیانوس میں قبضے میں لیے گئے آئل ٹینکروں کے عملے کو قانونی کارروائی کا سامنا کرنا ہوگا۔

ترجمان کے مطابق ٹرمپ انتظامیہ وینزویلا کے عبوری حکام سے قریبی رابطے میں ہے اور وہاں کے فیصلے امریکا کے طے کردہ فریم ورک کے تحت ہوں گے۔
انہوں نے کہا کہ امریکا وینزویلا اور آئل انڈسٹری کے ساتھ معاہدے پر کام کر رہا ہے، جس میں پابندی زدہ تیل بھی شامل ہے جو اس وقت جہازوں پر موجود ہے۔

کیرولین لیوٹ کا کہنا تھا کہ آئل کمپنیوں کے سربراہان رواں ہفتے وائٹ ہاؤس آئیں گے، اور اگر ضرورت پیش آئی تو صدر ٹرمپ آئل ورکرز کے تحفظ کے لیے امریکی فوج کے استعمال کا اختیار رکھتے ہیں۔
ترجمان نے مزید کہا کہ وینزویلا میں انتخابی ٹائم ٹیبل پر بات کرنا اس وقت قبل از وقت ہے۔