واشنگٹن ڈی سی فائرنگ کے بعد امریکا کا بڑا اقدام، 19 ممالک کے گرین کارڈ ہولڈرز کی سخت جانچ شروع

واشنگٹن ڈی سی میں نیشنل گارڈ کے دو اہلکاروں پر فائرنگ کے بعد امریکی صدر ڈونلڈ ٹرمپ نے اعلان کیا ہے کہ امریکا ’’تھرڈ ورلڈ‘‘ ممالک سے امیگریشن کو مستقل طور پر روکنے کے لیے گرین کارڈ ہولڈرز کی جانچ شروع کر رہا ہے۔ اس اقدام کے تحت 19 ممالک سے تعلق رکھنے والے قانونی مستقل رہائشیوں کے گرین کارڈز کا ’’فل اسکیل ریویو‘‘ کیا جائے گا۔

USCIS کے ڈائریکٹر جوزف ایڈلو نے کہا کہ افسران کو ملک سے تعلق رکھنے والے ’’خطرات‘‘ کو منفی عنصر کے طور پر دیکھنے کی ہدایت دی گئی ہے، اور امریکی عوام کی حفاظت سب سے اہم ہے۔

USCIS کی لسٹ میں افغانستان، ہیٹی، ایران، لیبیا، صومالیہ، یمن، سوڈان، میانمار اور دیگر ممالک شامل ہیں۔ ان میں سے 12 ممالک پر مکمل سفری پابندی جبکہ سات پر جزوی پابندیاں لاگو ہیں۔ تقریباً 33 لاکھ گرین کارڈ ہولڈرز ان ممالک سے تعلق رکھتے ہیں، جن میں کیوبا، ہیتی، ایران اور وینزویلا کی بڑی کمیونٹیز شامل ہیں۔

ٹرمپ نے وعدہ کیا کہ وہ ’’تمام تھرڈ ورلڈ ممالک سے مائیگریشن مستقل طور پر معطل‘‘ کریں گے اور بائیڈن دور میں داخل ہونے والے غیر قانونی تارکین وطن کو ملک بدر کرنے کا عندیہ دیا۔ تاہم، پہلے سے اسائلم، ریفیوجی یا CAT پروٹیکشن حاصل کرنے والے افراد اس پابندی سے مستثنیٰ ہیں۔

اس اقدام سے ہزاروں خاندان، کاروبار اور امیگریشن پروگرام متاثر ہو سکتے ہیں، اور سکیورٹی ایجنسیاں مزید جائزوں کی تیاری کر رہی ہیں۔