سرکاری ملازمین کیلئے سیاسی سرگرمیوں اور سوشل میڈیا استعمال پر سخت پابندیاں عائد

محکمہ ابتدائی و ثانوی تعلیم نے سرکاری ملازمین کے لیے سیاسی سرگرمیوں اور سوشل میڈیا کے استعمال سے متعلق واضح اور سخت ہدایات جاری کر دی ہیں۔

جاری کردہ اعلامیے کے مطابق سرکاری ملازمین کسی بھی سیاسی جلسے، جلوس یا اجتماع میں شرکت کے مجاز نہیں ہوں گے اور نہ ہی وہ اپنے سرکاری عہدے یا حیثیت کو سیاسی اثر و رسوخ کے لیے استعمال کر سکیں گے۔

اعلامیے میں واضح کیا گیا ہے کہ سرکاری ملازمین پر ذاتی سوشل میڈیا اکاؤنٹس کے ذریعے بھی کسی قسم کی سیاسی تشہیر، حمایت یا مخالفت پر مکمل پابندی عائد ہو گی۔

محکمہ تعلیم نے خبردار کیا ہے کہ ان ہدایات کی خلاف ورزی کی صورت میں متعلقہ ملازمین کے خلاف قواعد و ضوابط کے تحت محکمانہ کارروائی عمل میں لائی جائے گی، جس میں تادیبی اقدامات بھی شامل ہوں گے۔