ملک کو نقصان پہنچانے والے اور سازشیں کرنے والے پاکستان کے دشمن ہیں: گورنر پنجاب

گورنر پنجاب سردار سلیم حیدر خان نے کہا ہے کہ ملک کو نقصان پہنچانے والے اور اس کے خلاف سازشیں کرنے والے عناصر درحقیقت پاکستان کے دشمن ہیں۔

میانوالی میں ایک تقریب سے خطاب کرتے ہوئے گورنر پنجاب سردار سلیم حیدر خان کا کہنا تھا کہ پاکستان پیپلز پارٹی (پی پی پی) نے ہمیشہ ملک میں امن و استحکام، معاشی ترقی اور خوشحالی کے لیے جمہوری راستہ اپنایا ہے۔ انہوں نے سیاسی و سماجی حلقوں پر زور دیتے ہوئے کہا کہ موجودہ حالات کا تقاضا ہے کہ ہم سب اپنے تمام تر ذاتی اور سیاسی اختلافات کو یکسر بھلا کر ملک کے وسیع تر مفاد کی خاطر ایک پیج پر جمع ہو جائیں۔ سردار سلیم حیدر نے میانوالی کے عوام کے حوالے سے بات کرتے ہوئے کہا کہ پیپلز پارٹی میانوالی کے غیور لوگوں سے دلی محبت کرتی ہے۔ انہوں نے عزم ظاہر کیا کہ جب بھی پیپلز پارٹی کو اقتدار ملے گا، وہ میانوالی کی دیرینہ محرومیوں کو ترجیحی بنیادوں پر دور کرے گی اور یہاں عوامی فلاح و بہبود کے لیے ترقیاتی منصوبوں کا جال بچھا دے گی