خیبر پختونخوا کی ترقی امن کے قیام سے جڑی ہے: گورنر فیصل کریم کنڈی

گورنر خیبر پختونخوا فیصل کریم کنڈی نے جماعت اسلامی کے مرکز پشاور کا دورہ کیا، جہاں انہوں نے جماعت اسلامی کے نائب امیر پروفیسر ابراہیم اور دیگر صوبائی قیادت سے اہم ملاقات کی۔

ملاقات کے دوران صوبے کی امن و امان کی صورتحال، گورننس، آئینی و مالی حقوق اور ترقیاتی منصوبوں پر تفصیلی گفتگو کی گئی۔ گورنر کے پی نے واضح کیا کہ صوبے میں امن قائم ہوئے بغیر ترقی کا خواب پورا نہیں ہو سکتا، اس لیے امن کا قیام اور پولیس اہلکاروں و شہداء کے لواحقین کی فلاح و بہبود ان کی اولین ترجیح ہے۔ انہوں نے جنوبی اضلاع کی زمینوں کو آباد کر کے زراعت کو فروغ دینے اور انفارمیشن ٹیکنالوجی (IT) کے ذریعے نوجوانوں کے لیے روزگار کے نئے مواقع پیدا کرنے پر زور دیا۔

فیصل کریم کنڈی کا مزید کہنا تھا کہ بجلی کے خالص منافع (Net Hydel Profits)، این ایف سی ایوارڈ اور وفاق سے صوبے کے دیگر مالی و آئینی حقوق کے حصول کے لیے تمام سیاسی جماعتوں کا یکجا ہونا ضروری ہے۔ اس سلسلے میں انہوں نے خیبر پختونخوا کے جائز حقوق کی جنگ کے لیے جماعت اسلامی کی حمایت اور باہمی سیاسی تعاون کو ناگزیر قرار دیا۔