گورنر گلگت بلتستان کا صوبے کا درجہ دینے کا مطالبہ، وفاق پر وعدے پورے نہ کرنے کا الزام

لاہور میں پریس کانفرنس کرتے ہوئے گورنر گلگت بلتستان سید مہدی شاہ نے گلگت بلتستان کو علیحدہ صوبہ بنانے کا مطالبہ کر دیا۔ انہوں نے کہا کہ گلگت بلتستان میں انتخابات قریب ہیں مگر اب تک علاقے کو اس کے آئینی اور مالی حقوق نہیں ملے۔

گورنر مہدی شاہ نے کہا کہ پانی گلگت بلتستان سے نکلتا ہے مگر این ایف سی ایوارڈ میں حصہ نہیں ملتا، پہلے صوبہ بنایا جائے تاکہ این ایف سی میں شمولیت ممکن ہو۔ انہوں نے وفاقی وزراء کے دعوؤں پر تنقید کرتے ہوئے کہا کہ بجلی اور ترقیاتی منصوبوں کے وعدے پورے نہیں کیے گئے۔

انہوں نے کہا کہ گلگت بلتستان جغرافیائی طور پر انتہائی اہم خطہ ہے جو چین اور بھارت سمیت پانچ ممالک سے جڑا ہوا ہے، اس کے باوجود اسے نظر انداز کیا جا رہا ہے۔ گورنر کا کہنا تھا کہ اتحادی حکومت سے اب تک کوئی بڑا فائدہ نہیں ملا، جبکہ آنے والے انتخابات میں پیپلز پارٹی کو کامیابی حاصل ہوگی۔