حکومت ناکام ہوچکی، وقت آنے پر ہم کندھا بھی کھینچ سکتے ہیں: ندیم افضل چن

پاکستان پیپلز پارٹی کے مرکزی رہنما ندیم افضل چن نے حکومت کی کارکردگی کو شدید تنقید کا نشانہ بناتے ہوئے کہا ہے کہ موجودہ حکومت ناکام ہو چکی ہے اور اگر حالات نہ بدلے تو مناسب وقت پر ہم (پیپلز پارٹی) اپنی حمایت واپس بھی لے سکتے ہیں۔ نجی ٹی وی شو میں گفتگو کرتے ہوئے انہوں نے کہا کہ ملک کو درپیش چیلنجز سے نکالنے کے لیے تمام سیاسی جماعتوں کا ذاتی مفادات سے بالاتر ہو کر ایک میز پر بیٹھنا وقت کی اہم ضرورت ہے۔ انہوں نے وفاقی وزیر داخلہ محسن نقوی کے تمام اسٹیک ہولڈرز کو اکٹھا کرنے سے متعلق مؤقف کی تائید کرتے ہوئے کہا کہ اس پر پارلیمان اور میڈیا میں سنجیدہ بحث ہونی چاہیے۔ ندیم افضل چن کے مطابق اب یہ طے کرنے کا وقت آ گیا ہے کہ ملک کو پارلیمانی نظام کے تحت چلایا جائے یا صدارتی نظام کے تحت، کیونکہ موجودہ نظام مؤثر طریقے سے کام نہیں کر رہا۔ انہوں نے مزید انکشاف کیا کہ محسن نقوی کی حالیہ گفتگو پر پیپلز پارٹی سمیت صدر آصف علی زرداری کو بھی حیرت ہوئی ہے، جس سے ظاہر ہوتا ہے کہ ملکی حالات کی سنگینی کس حد تک بڑھ چکی ہے۔