گڈز ٹرانسپورٹرز کا مال بردار کرایوں میں 20 فیصد اضافے کا اعلان

پیٹرولیم مصنوعات کی قیمتوں میں حالیہ اضافے کے بعد پاکستان گڈز ٹرانسپورٹ الائنس نے ملک بھر میں مال بردار کرایوں میں 20 فیصد اضافے کا اعلان کر دیا ہے۔

الائنس کے صدر ملک شہزاد اعوان نے سخت ردعمل دیتے ہوئے کہا کہ گزشتہ دو ماہ کے دوران ڈیزل کی قیمت میں فی لیٹر 78 روپے جبکہ پیٹرول کی قیمت میں 68 روپے فی لیٹر اضافہ کیا گیا ہے، جس سے ٹرانسپورٹرز کے اخراجات میں نمایاں اضافہ ہوا ہے۔

ان کا کہنا تھا کہ اگر پیٹرولیم مصنوعات کی قیمتوں میں اضافہ ناگزیر ہے تو وفاقی حکومت کو چاہیے کہ ٹول ٹیکس اور دیگر ٹیکسز میں کمی کرے تاکہ ٹرانسپورٹرز کو کچھ ریلیف مل سکے۔

ملک شہزاد اعوان نے کہا کہ ملک کی نازک معاشی صورتحال کے باوجود ٹرانسپورٹرز امپورٹ، ایکسپورٹ اور کاروباری سرگرمیوں کو جاری رکھے ہوئے ہیں، مگر پیٹرولیم مصنوعات کی قیمتوں میں مسلسل اضافہ نہ صرف ٹرانسپورٹرز بلکہ ہر پاکستانی کو متاثر کرتا ہے اور اس سے مہنگائی میں مزید اضافہ ہوتا ہے۔

انہوں نے مزید کہا کہ وفاقی اور پنجاب حکومت کی پالیسیوں کے باعث ٹرانسپورٹرز کو ماضی میں 10 دن کی ملک گیر ہڑتال بھی کرنا پڑی تھی، جبکہ اس دوران سینئر وزیر پنجاب مریم اورنگزیب اور وزیر ٹرانسپورٹ پنجاب بلال اکبر کے ساتھ ہونے والے معاہدوں پر تاحال عملدرآمد نہیں کیا گیا۔

ان کا کہنا تھا کہ وفاقی وزیر مواصلات عبدالعلیم خان کی جانب سے کیے گئے وعدے بھی پورے نہیں کیے گئے۔

صدر پاکستان گڈز ٹرانسپورٹ الائنس نے مطالبہ کیا کہ وفاقی، پنجاب اور سندھ حکومتیں ٹرانسپورٹرز سے کیے گئے معاہدوں پر فوری عملدرآمد کریں، بصورت دیگر پالیسیوں پر نظرثانی نہ ہونے کی صورت میں ملک بھر میں ٹرانسپورٹ بند کرنے کا فیصلہ کیا جا سکتا ہے جس کی تمام تر ذمہ داری وفاقی حکومت پر ہوگی۔