ایران امریکا کشیدگی کے اثرات: عالمی منڈی میں خام تیل مزید مہنگا

امریکا کی جانب سے ایران کی تمام اہم بندرگاہوں پر دوبارہ بحری ناکہ بندی نافذ کیے جانے اور اس کے ردعمل میں ایران کی طرف سے خطے میں قائم امریکی فوجی اڈوں پر جوابی حملوں کے بعد عالمی منڈی میں خام تیل کی قیمتوں میں نمایاں اضافہ ریکارڈ کیا گیا ہے۔ مشرقِ وسطیٰ میں جنگی حالات اور کشیدگی کے باعث سپلائی چین متاثر ہونے کے خدشات نے توانائی کی عالمی مارکیٹ کو ہلا کر رکھ دیا ہے۔

حالیہ کاروباری سیشن کے دوران برینٹ خام تیل (Brent Crude) کی قیمت میں 1.46 ڈالرز یعنی 1.72 فیصد کا نمایاں اضافہ دیکھنے میں آیا، جس کے بعد اس کی قیمت 86.19 ڈالرز فی بیرل تک پہنچ گئی۔ اسی طرح، امریکی ویسٹ ٹیکساس انٹرمیڈیٹ (WTI) خام تیل کی قیمت بھی 1.11 ڈالرز یعنی 1.4 فیصد اضافے کے بعد 80.40 ڈالرز فی بیرل ریکارڈ کی گئی۔

توانائی کے امور کے ماہرین اور معاشی تجزیہ کاروں کا کہنا ہے کہ عالمی منڈی میں تیل کی سپلائی کے لیے ریڑھ کی ہڈی سمجھے جانے والے راستے “آبنائے ہرمز” کی بندش کے خطرات اور خطے میں مسلسل بڑھتی ہوئی جنگی صورتحال نے خریداروں میں تشویش پیدا کر دی ہے۔ سپلائی میں ممکنہ تعطل کے اسی خوف نے خام تیل کی قیمتوں کو تیزی سے اوپر دھکیل دیا ہے، جس کے اثرات عالمی معیشت پر پڑنے کا خدشہ ہے۔