عالمی منڈی میں خام تیل کی قیمتوں میں مسلسل دوسرے روز بھی اضافہ

عالمی منڈی میں خام تیل کی قیمتوں میں مسلسل دوسرے روز بھی اضافہ ریکارڈ کیا گیا ہے۔ کاروباری ہفتے کے دوران برینٹ کروڈ کی قیمت بڑھ کر 63.40 ڈالر فی بیرل ہو گئی، جبکہ ویسٹ ٹیکساس انٹرمیڈیٹ (WTI) خام تیل 54 سینٹ اضافے کے ساتھ 58.30 ڈالر فی بیرل پر پہنچ گیا۔

ماہرین کے مطابق خام تیل کی قیمتوں میں اضافے کی بڑی وجہ ایران اور وینزویلا سے متعلق بڑھتی ہوئی جغرافیائی اور سیاسی صورتحال ہے، جس کے باعث عالمی توانائی مارکیٹ میں بے یقینی پائی جا رہی ہے۔

واضح رہے کہ امریکا نے وینزویلا کے تیل کو غیر معینہ مدت تک کنٹرول کرنے کا اعلان کیا ہے۔ امریکی وزیر خارجہ مارکو روبیو کے مطابق امریکا وینزویلا سے 30 سے 50 ملین بیرل تیل وصول کرنے کے بعد اسے عالمی منڈی میں مارکیٹ ریٹ پر فروخت کرے گا، جس سے تیل کی قیمتوں پر اثر پڑ رہا ہے۔