دبئی: گلوبل ہیلتھ کیئر اینڈ ویلنس ایوارڈز کی شاندار تقریب، ڈاکٹرز کو اعزازات سے نوازا گیا

دبئی: متحدہ عرب امارات کے شہر دبئی میں تاریخی کوئین الزبتھ ٹو (Queen Elizabeth 2) کروز شپ پر ’گلوبل ہیلتھ کیئر اینڈ ویلنس ایوارڈز 2026‘ کی پروقار اور پرتعیش تقریب منعقد ہوئی، جس میں مختلف ممالک سے تعلق رکھنے والے ممتاز ڈاکٹرز، طبی ماہرین اور صحت و فلاح کے شعبے سے وابستہ نمایاں شخصیات کو ان کی خدمات پر شاندار خراجِ تحسین پیش کیا گیا۔

تقریب کے دوران ہیلتھ کیئر، ویلنس اور انسانی خدمت کے شعبوں میں بہترین کارکردگی کا مظاہرہ کرنے والے پیشہ ور افراد کو بین الاقوامی اعزازات سے نوازا گیا۔ ایوارڈز میں خصوصاً متحدہ عرب امارات میں مقیم پاکستانی ڈاکٹرز اور پاکستانی کمیونٹی سے تعلق رکھنے والی طبی شخصیات کی خدمات کا اعتراف کیا گیا، جسے پاکستانی پروفیشنلز کی عالمی سطح پر پذیرائی کا اہم پیش رفت قرار دیا جا رہا ہے۔

تقریب کے روحِ رواں اور آرگنائزر ڈاکٹر سید ایچ اے جوہر نے میڈیا سے گفتگو کرتے ہوئے کہا کہ ان ایوارڈز کا بنیادی مقصد دنیا بھر کے ڈاکٹرز، ہیلتھ کیئر پروفیشنلز اور انسانی خدمت کرنے والے افراد کی خدمات کو عالمی سطح پر تسلیم کرنا اور ان کی حوصلہ افزائی کرنا ہے۔ تقریب کے انتظامی امور فیصل امین کی نگرانی میں انجام دیے گئے، جبکہ معروف اماراتی بزنس لیڈر اور سابق پولیس افسر میجر عمر المزروئی نے بطور مہمانِ خصوصی شرکت کی۔ تقریب میں احمد صالح اور ڈاکٹر حافظ محمد ادریس نے بھی بطور مہمانانِ اعزاز شرکت کر کے نمایاں کارکردگی دکھانے والوں میں ایوارڈز تقسیم کیے۔