گلگت بلتستان کے شہری علاقوں میں بلدیاتی انتخابات 5 دسمبر کو کرانے کا اعلان

گلگت بلتستان کے شہری علاقوں میں طویل عرصے سے زیرِ التواء بلدیاتی انتخابات کا باضابطہ اعلان کر دیا گیا ہے، جہاں لوکل گورنمنٹ ایکٹ میں ضروری ترامیم کے بعد الیکشن شیڈول جاری کر دیا گیا ہے۔ گلگت بلتستان میں بلدیاتی انتخابات کا عمل مجموعی طور پر چار مراحل میں مکمل ہوگا۔

چیف الیکشن کمشنر گلگت بلتستان راجہ شہباز خان کے مطابق، انتخابی عمل کا پہلا مرحلہ 5 دسمبر کو منعقد ہوگا، جس کے تحت گلگت، سکردو اور چلاس کے شہری علاقوں میں میونسپل کارپوریشنز کے انتخابات ہوں گے۔ تفصیلی اعداد و شمار کے مطابق میونسپل کارپوریشن گلگت میں جنرل نشستیں 42، سکردو میں 21 جبکہ چلاس میں 13 نشستیں رکھی گئی ہیں۔ اس کے علاوہ خواتین کے لیے گلگت میں 7، سکردو میں 4 اور چلاس میں 2 مخصوص نشستیں مختص کی گئی ہیں، جبکہ تینوں شہروں میں غیر مسلموں، نوجوانوں اور خصوصی افراد کے لیے بھی ایک ایک مخصوص نشست رکھی گئی ہے۔

چیف الیکشن کمشنر کا کہنا ہے کہ شفاف اور منصفانہ انتخابات کے انعقاد کے لیے تمام انتظامی اور سیکورٹی تیاریاں مکمل کر لی گئی ہیں اور مرحلہ وار شیڈول کے تحت باقی اضلاع کا اعلان بھی جلد کیا جائے گا۔