گلگت بلتستان قانون ساز اسمبلی کے لیے انتخابی مہم کا آج آخری روز

گلگت: گلگت بلتستان قانون ساز اسمبلی کے عام انتخابات کے لیے سیاسی جماعتوں اور آزاد امیدواروں کی طوفانی انتخابی مہم کا آج آخری روز ہے، جس کے بعد پرسوں خطے بھر میں ووٹرز اپنا حقِ رائے دہی استعمال کریں گے۔

انتخابی مہم کے آخری دن تمام سیاسی جماعتیں اپنی پوری طاقت کا مظاہرہ کر رہی ہیں۔ پاکستان پیپلز پارٹی (PPP) کے چیئرمین بلاول بھٹو زرداری آج گلگت میں ایک بڑے انتخابی جلسے سے خطاب کر کے اپنی مہم کا اختتام کریں گے، جبکہ دوسری جانب پاکستان مسلم لیگ (ن) کی قیادت بھی آج خطے میں اپنی سیاسی طاقت کا مظاہرہ کرنے کے لیے ایک بڑی انتخابی ریلی نکالے گی۔الیکشن کمیشن کے مینیول اور فراہم کردہ تفصیلات کے مطابق، خطے میں انتخابی دنگل کی صورتحال کچھ یوں ہےحلقے اور پولنگ اسٹیشنز: گلگت بلتستان کے تمام 24 حلقوں میں پولنگ کے عمل کو آسان بنانے کے لیے مجموعی طور پر 1 ہزار 3 سو 68 (1,368) پولنگ اسٹیشنز قائم کر دیے گئے ہیں۔

ان 24 حلقوں سے کل 396 امیدوار انتخابی دوڑ میں شامل ہیں۔

آزاد اور خواتین امیدوار: اس بار کے انتخابات کی خاص بات یہ ہے کہ ریکارڈ 266 آزاد امیدوار اپنی قسمت آزما رہے ہیں، جبکہ میدانِ کارزار میں 7 خواتین امیدوار بھی مرد امیدواروں کے مدِ مقابل الیکشن لڑ رہی ہیں۔گلگت بلتستان کی نئی ووٹر لسٹوں کے مطابق، خطے میں رجسٹرڈ ووٹرز کی کل تعداد 9 لاکھ 58 ہزار 80 ہے۔ جن کی صنف وار تقسیم درج ذیل ہے

مرد ووٹرز: 5 لاکھ 3 ہزار 772

خواتین ووٹرز: 4 لاکھ 54 ہزار 708
گلگت بلتستان پولیس کی جانب سے جاری کردہ ایک باقاعدہ رپورٹ میں بتایا گیا ہے کہ پورے خطے میں امن و امان کی مجموعی صورتحال انتہائی تسلی بخش اور فورسز کے مکمل قابو میں ہے۔

عسکری و پولیس حکام کے مطابق، یکم مئی سے لے کر اب تک انتہائی پرامن ماحول میں مجموعی طور پر 614 سیاسی سرگرمیاں منعقد ہو چکی ہیں، جن میں 62 بڑے عوامی اجتماعات، 217 کارنر میٹنگز (عوامی نشستیں) و افتتاحی تقریبات، 243 انتخابی دفاتر کا قیام اور 92 سیاسی جلوس شامل ہیں۔پولیس کے اعلیٰ حکام نے عام عوام، سیاسی کارکنوں اور امیدواروں کو سختی سے ہدایت کی ہے کہ وہ انتخابی عمل کے دوران اعلیٰ ذمہ داری، برداشت اور قانون پسندی کا مظاہرہ کریں۔ تمام شہریوں کے لیے انتخابی ضابطہ اخلاق اور ملکی قوانین کی مکمل پاسداری کرنا لازمی ہے۔

پولیس نے خبردار کیا ہے کہ سوشل میڈیا یا پبلک پلیسز پر کسی بھی قسم کی افواہوں، اشتعال انگیز بیانات اور منفی پروپیگنڈے سے مکمل اجتناب کیا جائے۔ گلگت بلتستان پولیس نے واضح کیا ہے کہ کسی بھی ناخوشگوار واقعے، ہنگامی صورتحال یا مشکوک سرگرمی کی فوری اطلاع دینے کے لیے شہری ان کی آفیشل ہیلپ لائن 15 پر رابطہ کریں۔