گھوٹکی میں مسافر بس پر ڈاکوؤں کا حملہ، 18 مسافر اغوا

گھوٹکی میں گڈو کشمور روڈ پر ڈاکوؤں نے مسافر بس پر حملہ کرکے 18 مسافروں کو اغوا کر لیا۔ واقعہ مرید شاخ کے قریب پیش آیا، جہاں مسلح ڈاکوؤں نے بس کو روک کر فائرنگ کی۔

پولیس کے مطابق بس میں مجموعی طور پر 25 مسافر سوار تھے، جن میں خواتین بھی شامل تھیں۔ عینی شاہدین کا کہنا ہے کہ ڈاکو خواتین کو چھوڑ کر 18 مرد مسافروں کو اپنے ساتھ لے گئے۔

پولیس نے بتایا کہ حملے کے دوران ڈاکوؤں کی فائرنگ سے بس کے شیشے ٹوٹ گئے، تاہم خوش قسمتی سے کسی مسافر کے زخمی ہونے کی اطلاع نہیں ملی۔

واقعے کے بعد پولیس اور رینجرز نے مشترکہ طور پر ڈاکوؤں کی تلاش اور اغوا شدہ مسافروں کی بازیابی کے لیے علاقے میں سرچ آپریشن شروع کر دیا ہے۔