گلگت بلتستان میں شفاف انتخابات کیلئے جامع سیکیورٹی منصوبہ تیار، وزیراعظم مطمئن

اسلام آباد: وزیراعظم شہباز شریف نے گلگت بلتستان میں آئندہ انتخابات کے پُرامن انعقاد کیلئے کیے گئے سیکیورٹی انتظامات پر اطمینان کا اظہار کرتے ہوئے کہا ہے کہ حکومت جمہوری اقدار کے تحفظ اور انتخابی عمل کی شفافیت کیلئے تمام ضروری اقدامات جاری رکھے گی۔

وزیراعظم شہباز شریف سے وفاقی وزیر داخلہ محسن نقوی نے ملاقات کی، جس میں ملکی سیکیورٹی صورتحال، امن و امان کے امور اور عید الاضحیٰ کے موقع پر حفاظتی انتظامات کا جائزہ لیا گیا۔

وزیر داخلہ نے وزیراعظم کو بریفنگ دیتے ہوئے بتایا کہ عوام کے جان و مال کے تحفظ اور حساس مقامات کی نگرانی کیلئے خصوصی انتظامات کیے گئے ہیں، جبکہ گلگت بلتستان انتخابات کے دوران امن و امان برقرار رکھنے کیلئے جامع سیکیورٹی منصوبہ بھی تشکیل دیا گیا ہے۔

انہوں نے کہا کہ ووٹرز کو محفوظ ماحول کی فراہمی اور انتخابی عمل کو منظم بنانے کیلئے تمام متعلقہ ادارے مکمل طور پر متحرک ہیں۔

ملاقات میں وزیراعظم نے وزارت داخلہ، قانون نافذ کرنے والے اداروں اور سیکیورٹی فورسز کی پیشہ ورانہ خدمات کو سراہا اور کہا کہ عوامی تحفظ اور قومی استحکام کیلئے اداروں کی کاوشیں قابل قدر ہیں۔

وزیراعظم نے گلگت بلتستان میں انتخابات کے مؤثر انعقاد کیلئے کیے گئے اقدامات کی تعریف کرتے ہوئے اس امید کا اظہار کیا کہ انتخابی عمل شفاف، منصفانہ اور پُرامن انداز میں مکمل ہوگا۔