وزیراعظم کے دورۂ گلگت پر ضابطہ اخلاق کی خلاف ورزی، مسلم لیگ ن کے 7 رہنماؤں کو نوٹس جاری

گلگت بلتستان الیکشن کمیشن نے وزیراعظم شہباز شریف کے حالیہ دورۂ گلگت کے دوران انتخابی ضابطہ اخلاق کی مبینہ خلاف ورزی پر پاکستان مسلم لیگ ن کے 7 امیدواروں اور رہنماؤں کو شوکاز نوٹس جاری کر دیے ہیں۔

الیکشن کمیشن کے مطابق 7 مئی کو وزیراعظم کے دورے کے دوران این او سی میں دی گئی شرائط اور انتخابی ضابطہ اخلاق کی خلاف ورزی کی گئی، جس پر ضلعی مانیٹرنگ افسر نے کارروائی کرتے ہوئے متعلقہ رہنماؤں کو نوٹس ارسال کیے۔

نوٹس جاری کیے جانے والوں میں سابق وزیراعلیٰ گلگت بلتستان اور صدر مسلم لیگ ن گلگت بلتستان حافظ حفیظ الرحمان، ڈاکٹر محمد اقبال، عتیق الرحمان، محمد عالمگیر، رانا فرمان، حبیب اللہ اور شفیق الدین شامل ہیں۔

الیکشن کمیشن کا کہنا ہے کہ تمام رہنماؤں کو 12 مئی کو دوپہر 2 بجے ڈپٹی کمشنر گلگت کے دفتر میں ذاتی حیثیت یا اپنے وکیل کے ذریعے پیش ہونے کی ہدایت کی گئی ہے۔

نوٹس میں واضح کیا گیا ہے کہ مقررہ وقت میں وضاحت جمع نہ کرانے کی صورت میں الیکشن ایکٹ 2017 کے تحت قانونی کارروائی عمل میں لائی جائے گی۔

الیکشن کمیشن کے مطابق انتخابات کے دوران ضابطہ اخلاق پر سختی سے عمل درآمد یقینی بنایا جا رہا ہے تاکہ شفاف انتخابی عمل برقرار رکھا جا سکے۔