ملک میں مہنگائی کا طوفان، عام آدمی کی زندگی اجیرن ہوچکی ہے: حافظ نعیم الرحمان

امیر جماعت اسلامی حافظ نعیم الرحمان نے ملک میں بڑھتی ہوئی مہنگائی، بدترین لوڈشیڈنگ اور امن و امان کی خراب صورتحال پر شدید تشویش کا اظہار کرتے ہوئے 3 ستمبر کو بھرپور ملک گیر ہڑتال کا اعلان کر دیا ہے۔ صنعتکاروں اور تاجروں سے ملاقات کے بعد میڈیا سے گفتگو کرتے ہوئے انہوں نے کہا کہ پٹرولیم پروڈکٹس کی قیمتوں میں اضافے نے عام آدمی کی زندگی اجیرن کر دی ہے، لہٰذا حکومت فوراً پٹرولیم لیوی ختم کرے اور بجلی و روٹی کی قیمتوں میں کمی لائے۔ حافظ نعیم الرحمان نے دعویٰ کیا کہ جماعت اسلامی کے آئی پی پیز (IPPs) کے خلاف دھرنوں کی بدولت عوام کو بجلی کے شعبے میں ریلیف ملا ہے اور اس وقت بھی ملک کے تمام بڑے شہروں اور اضلاع میں احتجاجی دھرنے جاری ہیں۔ انہوں نے تاجر برادری سے 3 ستمبر کی ہڑتال میں بھرپور ساتھ دینے کی اپیل کی ہے۔