گلگت بلتستان میں ن لیگ اور پیپلز پارٹی کے اتحاد سے حکومت سازی کا امکان، پاور شیئرنگ فارمولا طے

گلگت بلتستان میں مسلم لیگ (ن) اور پاکستان پیپلز پارٹی کے درمیان اتحاد کے بعد حکومت سازی کا امکان ظاہر کیا جا رہا ہے۔

ذرائع کے مطابق دونوں جماعتوں کے درمیان پی ڈی ایم طرز پر ممکنہ اتحاد پر غور کیا جا رہا ہے جس کے تحت خطے میں مشترکہ حکومت تشکیل دی جائے گی۔

مجوزہ فارمولے کے مطابق وزیراعلیٰ کا تعلق پیپلز پارٹی سے جبکہ گورنر مسلم لیگ (ن) سے ہونے کا امکان ہے۔

ذرائع کا کہنا ہے کہ اتحادی حکومت میں وزارتوں کی تقسیم کا فارمولہ ساٹھ اور چالیس کے تناسب سے طے کیا جا رہا ہے۔

ذرائع کے مطابق دونوں جماعتوں کے درمیان بجٹ اور دیگر اہم امور پر بھی بڑی حد تک اتفاق رائے ہو چکا ہے، جبکہ آئندہ حکومت سازی کے عمل میں پیش رفت متوقع ہے۔