غزہ میں اسرائیلی حملے جاری، القسام کمانڈر سمیت 5 فلسطینی شہید

غزہ پٹی پر اسرائیل کی تازہ ترین وحشیانہ کارروائیوں میں کم از کم 5 فلسطینی شہید اور متعدد افراد زخمی ہو گئے ہیں۔ فلسطینی وزارتِ صحت کے مطابق غزہ کے مختلف علاقوں میں ہونے والے ان اسرائیلی حملوں کے نتیجے میں بڑے پیمانے پر جانی نقصان ہوا ہے۔ دوسری جانب اسرائیلی فوج نے دعویٰ کیا ہے کہ انہوں نے دیر البلح میں ایک فضائی حملے کے دوران حماس کے عسکری ونگ القسام بریگیڈز کے اسنائپر یونٹ کے اہم کمانڈر عمر ابو قاسم کو نشانہ بنایا ہے۔

فلسطینی طبی ذرائع نے حملے کی تصدیق کرتے ہوئے بتایا کہ اس فضائی کارروائی میں عمر ابو قاسم، ان کی اہلیہ اور 6 سالہ بیٹی موقع پر ہی شہید ہو گئے، جبکہ ان کی ایک کمسن بیٹی شدید زخمی ہوئی ہے جسے ہسپتال منتقل کر دیا گیا ہے۔ اسرائیلی فوج کا موقف ہے کہ عمر ابو قاسم غزہ جنگ کے دوران اسرائیلی فورسز پر کیے جانے والے متعدد حملوں میں براہِ راست ملوث تھے، تاہم اسرائیلی فوج کے اس دعوے پر فلسطینی مزاحمتی تنظیم کی طرف سے فی الحال فوری طور پر کوئی ردعمل سامنے نہیں آیا ہے