بنگلادیش کی سابق وزیراعظم خالدہ ضیاء کی نماز جنازہ ادا کر دی گئی

بنگلادیش کی سابق وزیراعظم خالدہ ضیاء کی نمازِ جنازہ ادا کر دی گئی، جس میں عبوری حکومت کے سربراہ محمد یونس، بنگلہ دیش کے صدر محمد شہاب الدین سمیت ہزاروں افراد نے شرکت کی۔ نمازِ جنازہ میں اسپیکر قومی اسمبلی سردار ایاز صادق نے پاکستان کی نمائندگی کی، جبکہ مالدیپ، بھوٹان، نیپال اور سری لنکا کے اعلیٰ سطح وفود بھی تعزیت کے لیے بنگلہ دیش پہنچے۔

خالدہ ضیاء کو قومی اعزاز کے ساتھ ان کے شوہر اور سابق صدر ضیاء الرحمان کے پہلو میں سپردِ خاک کیا جائے گا۔ ان کے انتقال پر بنگلہ دیش میں آج عام تعطیل ہے جبکہ ملک بھر میں تین روزہ سوگ منایا جا رہا ہے۔

یاد رہے کہ خالدہ ضیاء طویل عرصے سے جگر کے عارضے سمیت مختلف بیماریوں میں مبتلا تھیں اور ڈھاکا کے ایک اسپتال میں زیرِ علاج تھیں، تاہم گزشتہ روز وہ انتقال کر گئیں۔ خالدہ ضیاء بنگلہ دیش کی پہلی خاتون وزیراعظم تھیں، جبکہ مسلم دنیا میں وہ سابق وزیراعظم پاکستان بینظیر بھٹو کے بعد دوسری خاتون وزیراعظم ہونے کا اعزاز بھی رکھتی تھیں۔

انہوں نے 1991 سے 1996 اور پھر 2001 سے 2006 تک بنگلہ دیش کی وزیراعظم کے طور پر خدمات انجام دیں۔