پی آئی اے کی پرواز فجیرہ میں میزائل حملے سے بال بال بچ گئی

فجیرہ / کراچی: مشرق وسطیٰ میں جاری کشیدگی کے دوران فجیرہ ایئرپورٹ کے قریب میزائل حملہ ہوا جس کے دوران پی آئی اے کی پرواز محفوظ رہی، تاہم واپسی پر ایک اور طیارے کو فنی خرابی کا سامنا کرنا پڑا۔

ذرائع کے مطابق پی کے 175 نے فجیرہ ایئرپورٹ پر لینڈ کیا تو اسی دوران قریبی نیول ہیڈ کوارٹر کو میزائل کا نشانہ بنایا گیا، جس کے نتیجے میں علاقے میں دھواں پھیل گیا۔ طیارے میں 123 مسافر اور عملے کے 8 ارکان سوار تھے، واقعے کے بعد شدید خوف و ہراس دیکھنے میں آیا۔

پی آئی اے کے ترجمان کے مطابق صورتحال کو فوری طور پر قابو میں لے لیا گیا جبکہ حفاظتی اقدامات کے باعث پروازوں کی واپسی میں عارضی تاخیر ہوئی۔ بعد ازاں پی کے 173 اور پی کے 175 بحفاظت پاکستان پہنچ گئیں۔

ادھر فجیرہ سے لاہور آنے والی پرواز پی کے 178 میں دوران پرواز فنی خرابی پیدا ہوئی جس کے باعث طیارے کی بلندی کم کر کے 10 ہزار فٹ کر دی گئی اور اسے کراچی ایئرپورٹ پر اتارا گیا۔

ترجمان کے مطابق انجینئرز خرابی دور کرنے میں مصروف ہیں اور پرواز کو جلد اپنی منزل کی جانب روانہ کیا جائے گا۔ ماہرین نے موجودہ صورتحال میں فضائی سفر کو حساس قرار دیا ہے۔