خیبرپختونخوا حکومت نے توانائی بچت کی وفاقی تجاویز پر اتفاق کر لیا

پشاور: خیبرپختون خوا حکومت نے وفاقی حکومت کی توانائی بچت سے متعلق تجاویز سے اتفاق کر لیا  ذرائع نے تصدیق کردی۔
وفاقی حکومت نے کورونا کے دوران استعمال کی جانے والی پالیسی کے بیشتر نکات صوبائی حکومت کو بھیجے تھے، جن میں مارکیٹوں کو محدود کرنے، ورکنگ ڈیز میں کمی، ورک فرام ہوم، دفاتر میں 50 فیصد عملے کو روٹیشن پالیسی پر کام کرنے اور تعلیمی اداروں میں آن لائن کلاسز کی تجاویز شامل ہیں۔

صوبائی کابینہ آج ہونے والے اجلاس میں توانائی بحران سے متعلق تجاویز پر غور کرے گی۔ مشیر خزانہ مزمل اسلم نے کہا کہ توانائی بچت ضروری ہے لیکن عوامی مفاد کو مدنظر رکھنا بہت اہم ہے۔
چیف سیکریٹری شہاب علی شاہ نے کہا کہ پیٹرولیم مصنوعات کی قیمتوں اور دستیابی کو ڈیجیٹلی مانیٹر کیا جا رہا ہے اور ذخیرہ اندوزی کرنے والوں کے خلاف سخت کارروائی کی جائے گی۔