مغربی کنارے میں یہودی آبادکاروں نے فرانسیسی میئر کو بھی تشدد کا نشانہ بنایا

مقبوضہ مغربی کنارے کے فلسطینی قصبے طیبہ میں اسرائیلی آبادکاروں کے پرتشدد حملے کا شکار بننے والے فرانسیسی میئر برنار بوڈو نے کہا ہے کہ یہ واقعہ اسرائیل کی سخت گیر دائیں بازو کی حکومت کی جانب سے آبادکاروں کی غنڈہ گردی اور تشدد کو دی جانے والی کھلی چھوٹ کی عکاسی کرتا ہے۔

فرانسیسی خبر رساں ادارے (AFP) سے گفتگو کرتے ہوئے شمالی فرانس کے قصبے اولوئے-ایمیری کے میئر برنار بوڈو نے بتایا کہ وہ خیرسگالی کے دورے پر طیبہ میں زیتون کی فصل کی کٹائی کے موقع پر موجود تھے جہاں ان پر اسرائیلی آبادکاروں نے حملہ کیا۔ انہوں نے شدید تشویش کا اظہار کرتے ہوئے کہا کہ اگر آبادکار اس طرح بلا خوف و خطر حملے کر رہے ہیں تو اس سے صاف ظاہر ہوتا ہے کہ اسرائیلی انتظامیہ ان کے اس رویے کو برداشت کر رہی ہے اور ان کی سرپرستی کر رہی ہے۔

اطلاعات کے مطابق اس دورے کے دوران یورپی سفارت کاروں کو بھی نشانہ بنایا گیا۔ اسرائیلی آرمی ریڈیو کے مطابق فرانس، بیلجیئم اور پولینڈ کے سفارت کاروں کی گاڑیوں پر نقاب پوش آبادکاروں نے شدید پتھراؤ کیا، جس سے بیلجیئم کے قونصل خانے کی گاڑی کے شیشے ٹوٹ گئے۔ عینی شاہدین کے مطابق نقاب پوشوں نے سفارتی گاڑی کو گھیر کر سوار افراد سے شناختی دستاویزات کا بھی مطالبہ کیا۔ مغربی کنارے میں جاری آبادکاروں کے ان حملوں نے عالمی برادری میں انسانی حقوق اور سلامتی کی صورت حال پر سنگین سوالات کھڑے کر دیے ہیں، جبکہ اسرائیلی حکومت کا اس واقعے پر کوئی باضابطہ موقف سامنے نہیں آیا۔