لبنانی صدر کا جنوبی لبنان میں سکیورٹی خلا روکنے کیلئے عالمی انتظام کا خیرمقدم

فرانس کے وزیرِ خارجہ ژاں نوئل بارو نے بیروت میں لبنانی صدر جوزف عون سے اہم ملاقات کی، جس کے دوران جنوبی لبنان کی امن و امان کی صورتِ حال اور علاقائی تنازع پر تفصیلی تبادلہ خیال کیا گیا۔

ملاقات کے دوران لبنانی صدر جوزف عون نے جنوبی لبنان میں کسی بھی قسم کے سکیورٹی خلا کو روکنے کے لیے بین الاقوامی سطح پر کیے جانے والے انتظامی اقدامات کا خیرمقدم کیا۔ انہوں نے خطے میں پائیدار امن کی بحالی کے لیے اقوامِ متحدہ کی عبوری امن فورس (UNIFIL) کے مینڈیٹ میں توسیع کی خواہش کا بھی اظہار کیا۔

صدر جوزف عون نے زور دے کر کہا کہ جنوبی لبنان میں اقتدار یا سکیورٹی کا خلا پیدا نہیں ہونا چاہیے اور اس مقصد کے لیے ایسا متبادل بین الاقوامی انتظام تشکیل دیا جائے جس سے لبنانی فوج کا اسرائیلی افواج سے براہِ راست تصادم نہ ہو۔ فرانسیسی وزیرِ خارجہ نے لبنانی خودمختاری اور استحکام کی حمایت کا اعادہ کیا۔