ساہیوال میں مال بردار ٹرین پٹڑی سے اتر گئی، اَپ ٹریک آمدورفت کیلئے بند

ہڑپہ ریلوے اسٹیشن کے قریب کوئلہ لے کر کول پاور پلانٹ جانے والی ایک مال بردار ریل گاڑی اچانک پٹڑی سے اتر گئی۔ اسٹیشن ماسٹر کے مطابق حادثے کی اطلاع ملتے ہی مال بردار ٹرین کو دوبارہ ٹریک پر لانے اور بحالی کے کام کے لیے خانیوال سے ماہرین کی خصوصی ٹیم روانہ کر دی گئی ہے، تاہم حادثے کے باعث اپ ٹریک کو عارضی طور پر آمدورفت کے لیے بند کر دیا گیا ہے۔ ریلوے حکام کا کہنا ہے کہ خوش قسمتی سے اس حادثے میں کوئی جانی نقصان نہیں ہوا، البتہ ٹرین کی ایک بوگی پٹڑی سے اترنے کی وجہ سے دوسری ریلوے لائن بھی متاثر ہوئی ہے جسے جلد از جلد بحال کرنے کی کوششیں کی جا رہی ہیں۔