فرانس میں مظاہرے، 5 لاکھ افراد شریک، لوٹ مار، ہنگامہ آرائی، 400 گرفتار

فرانس بھر میں مہنگائی اور حکومتی پالیسیوں کے خلاف ہونے والے احتجاجی مظاہروں نے پرتشدد شکل اختیار کر لی ہے، جن میں پانچ لاکھ سے زائد افراد نے شرکت کی۔ اس دوران بڑے پیمانے پر ہنگامہ آرائی اور لوٹ مار کے واقعات بھی پیش آئے، جبکہ حکام نے کارروائی کرتے ہوئے 400 افراد کو حراست میں لے لیا ہے۔

فرانس کے وزیرِ داخلہ لوراں نونیز نے میڈیا کو بریفنگ دیتے ہوئے بتایا کہ ملک بھر کے مظاہروں میں مجموعی طور پر 5 لاکھ 50 ہزار افراد شریک ہوئے، جن میں اکیلے دارالحکومت پیرس میں مظاہرین کی تعداد 1 لاکھ 10 ہزار تھی۔ انہوں نے بتایا کہ گرفتار کیے جانے والے افراد میں اکثریت بالغوں کی ہے جن کا طلبہ تحریک سے کوئی واسطہ نہیں ہے۔ ان پرتشدد جھڑپوں اور ہنگاموں کے دوران قانون نافذ کرنے والے اداروں کے 60 اہلکار زخمی ہوئے، جن میں سے دو کو تشویشناک حالت میں ہسپتال منتقل کیا گیا۔

وزیرِ داخلہ نے اس تمام تشدد کا ذمہ دار ‘انتہا پسند بائیں بازو’ کے عناصر کو ٹھہراتے ہوئے کہا کہ ان کا مقصد سرکاری عمارتوں کو نشانہ بنانا تھا۔ پیرس، روآن، نانت، تولوز اور مارسی سمیت کئی شہروں میں دکانوں میں لوٹ مار اور توڑ پھوڑ کے واقعات ریکارڈ کیے گئے۔ دوسری جانب فرانسیسی صدر نے دوٹوک الفاظ میں اعلان کیا ہے کہ فرانس میں تشدد کے لیے کوئی جگہ نہیں ہے، اور صوبائی دفاتر، کاروباری مراکز اور بلدیاتی عمارتوں کو نقصان پہنچانے یا لوٹ مار میں ملوث تمام عناصر کو کڑی سزا دی جائے گی۔