شرح سود برقرار رکھنے کے فیصلہ پر ایف پی سی سی آئی کا ردِ عمل آگیا

فیڈریشن آف پاکستان چیمبرز آف کامرس اینڈ انڈسٹری (FPCCI) نے اسٹیٹ بینک آف پاکستان کی جانب سے شرح سود 11.5 فیصد پر برقرار رکھنے کے فیصلے پر شدید تشویش کا اظہار کرتے ہوئے اسے کاروباری برادری کی توقعات کے برعکس قرار دیا ہے۔ ایف پی سی سی آئی کے صدر عاطف اکرام شیخ نے بیان جاری کرتے ہوئے کہا کہ معاشی اشاریوں میں بہتری کے باوجود پالیسی ریٹ میں کمی نہ کرنے سے صنعتی پیداوار، نئی سرمایہ کاری اور برآمدات شدید متاثر ہونے کا خدشہ ہے۔ انہوں نے زور دیا کہ کاروباری لاگت میں کمی اور روزگار کے مواقع بڑھانے کے لیے شرح سود کو سنگل ڈیجٹ میں لانا ناگزیر ہو چکا ہے۔ صدر ایف پی سی سی آئی نے مطالبہ کیا کہ اسٹیٹ بینک آئندہ مانیٹری پالیسی میں معاشی حقائق کو مدنظر رکھتے ہوئے شرح سود میں نمایاں کمی کرے تاکہ معاشی نمو کو فروغ مل سکے۔