بانی پی ٹی آئی عمران خان کو سبی جیل بھیجا جائے تاکہ انہیں جیل کی حقیقت کا اندازہ ہو,عابد شیر علی

پاکستان مسلم لیگ (ن) کے رہنما عابد شیر علی نے الیکشن کمیشن کے باہر میڈیا سے گفتگو کرتے ہوئے کہا کہ بانی پی ٹی آئی عمران خان کو سبی جیل بھیجا جائے تاکہ انہیں جیل کی حقیقت کا اندازہ ہو۔ انہوں نے کہا کہ اگر عمران خان کو اٹک قلعہ یا سبی جیل میں رکھا جائے، جیسا کہ ماضی میں نواز شریف کو رکھا گیا، تو پھر جیل کا صحیح مطلب سمجھ آئے گا۔

عابد شیر علی نے کہا کہ بانی پی ٹی آئی رات کے اندھیرے میں احتجاج کرتے ہیں، جبکہ مجرموں کو دن کے وقت ملاقات کی اجازت ہوتی ہے۔ ان کا کہنا تھا کہ اگر رات کے اندھیرے میں کوئی ناخوشگوار واقعہ پیش آتا ہے تو اس کی ذمہ داری حکومت پر عائد ہوتی ہے کہ وہ اسے روکے۔ انہوں نے سوال اٹھایا کہ اگر اس دوران دہشت گردی کا کوئی واقعہ ہو جائے تو اس کا ذمہ دار کون ہوگا؟

انہوں نے واضح کیا کہ عمران خان نیازی کو عدالتی احکامات کے تحت ہفتے میں ایک بار ملاقات کی اجازت ہے اور ہر روز کسی قیدی سے ملاقات ممکن نہیں ہوتی۔

عابد شیر علی نے بھارت میں خواتین کے ساتھ ہونے والے سلوک پر بھی سخت ردعمل دیا اور کہا کہ بھارت میں خواتین کا نقاب اتارنے کی شدید مذمت کرتے ہیں۔ ان کا کہنا تھا کہ بھارت میں درندہ صفت لوگ بیٹیوں اور بہنوں پر ہاتھ ڈالتے ہیں، جو قابلِ مذمت ہے۔

میڈیا سے گفتگو کے اختتام پر انہوں نے ایک بار پھر مطالبہ کیا کہ عمران خان کو ایسی جیل میں رکھا جائے جہاں انہیں قانون کے مطابق قید و بند کی سختیوں کا سامنا کرنا پڑے، تاکہ قانون سب کے لیے برابر ہونے کا عملی ثبوت سامنے آئے۔