امریکا: سابق خفیہ ادارے کے افسر کے گھر سے کروڑوں ڈالر مالیت کی سونے کی اینٹیں برآمد

امریکا میں خفیہ ادارے کے ایک سابق سینئر افسر کے گھر سے کروڑوں ڈالر مالیت کی سونے کی اینٹیں، لاکھوں ڈالر نقد رقم اور قیمتی گھڑیاں برآمد ہونے کے بعد بڑے مالیاتی اسکینڈل کا انکشاف سامنے آیا ہے۔

امریکی ذرائع ابلاغ کے مطابق سابق افسر ڈیوڈ رش پر عوامی فنڈز میں خرد برد اور سرکاری رقم ذاتی استعمال میں لانے کا الزام عائد کیا گیا ہے۔ عدالتی دستاویزات میں کہا گیا ہے کہ ملزم اعلیٰ خفیہ سطح کی رسائی رکھتا تھا اور حساس مالی معاملات تک اس کی رسائی موجود تھی۔

وفاقی تحقیقاتی ادارے کے حلف نامے کے مطابق ڈیوڈ رش نے گزشتہ چند ماہ کے دوران غیر ملکی کرنسی اور دسیوں ملین ڈالر مالیت کے سونے کے حصول کے لیے بڑی رقوم کی درخواست کی۔ اس نے مبینہ طور پر حکام کو مؤقف اختیار کیا کہ رقم سرکاری اور دفتری اخراجات کے لیے درکار ہے۔

تحقیقات کے دوران حکام کو فنڈز کا صرف ایک حصہ دفتر کے قریب ایک گودام سے ملا جبکہ بعد ازاں وفاقی اہلکاروں نے اٹھارہ مئی کو ملزم کے گھر کی تلاشی لی۔

عدالتی دستاویزات کے مطابق تلاشی کے دوران تقریباً 300 سونے کی اینٹیں برآمد ہوئیں جن کی مالیت 40ملین ڈالر سے زائد بتائی گئی ہے۔ اس کے علاوہ امریکی کرنسی میں تقریباً 20لاکھ ڈالر نقد رقم اور 35 قیمتی گھڑیاں بھی ضبط کی گئیں۔

حلف نامے میں الزام لگایا گیا ہے کہ ملزم نے جان بوجھ کر سرکاری استعمال کے لیے مختص رقم اپنے ذاتی فائدے کے لیے گھر منتقل کی۔ ملزم کے وکیل نے تاحال اس معاملے پر کوئی ردعمل نہیں دیا۔