گوجرانوالہ: گرڈ سٹیشن میں آتشزدگی، کروڑوں کے ٹرانسفارمر اور تار خاکستر

گوجرانوالہ کے علاقے شاہین آباد گرڈ سٹیشن کے ایم این ٹی (MNT) اور ریجنل سٹور میں اچانک ہولناک آگ بھڑک اٹھی، جس نے دیکھتے ہی دیکھتے پورے سٹور کو اپنی لپیٹ میں لے لیا۔ آتشزدگی کے باعث سٹور میں موجود کروڑوں روپے مالیت کے ٹرانسفارمر، تاریں اور دیگر قیمتی سامان جل کر خاکستر ہو گیا۔ اطلاع ملتے ہی ریسکیو 1122 کی فائر فائٹنگ ٹیمیں اور پولیس کی بھاری نفری موقع پر پہنچ گئی۔ تیز ہواؤں کے باعث شعلے مسلسل پھیلتے رہے جس سے امدادی کارروائیوں میں شدید مشکلات کا سامنا کرنا پڑا، تاہم ریسکیو 1122 کے 5 فائر ٹینڈرز نے رات گئے تک جاری رہنے والے آپریشن کے بعد 4 گھنٹے میں آگ پر قابو پا لیا۔

ریسکیو حکام کے مطابق، جس وقت نامعلوم وجوہات کی بنا پر ایم این ٹی سٹور میں آگ لگی، اس وقت گیپکو (GEPCO) کے ملازمین وہاں کام کر رہے تھے۔ آگ پر قابو پانے کے بعد ریسکیو ٹیموں کی جانب سے کولنگ کا عمل جاری رکھا گیا اور علاقے میں سکیورٹی و حفاظتی اقدامات سخت کر دیے گئے ہیں۔ گیپکو حکام کا کہنا ہے کہ آتشزدگی سے ہونے والے کل مالی نقصان کا حتمی تخمینہ فی الحال نہیں لگایا جا سکا، تاہم واقعے کی تمام پہلوؤں سے مکمل اور شفاف تحقیقات شروع کر دی گئی ہیں۔